Catalonha Internacionau publique er informe sus era preséncia e representacion de Catalonha en 10 granes capçaleres pendent 2025

Dempuish 2019, Catalonha Internacionau hè un seguiment dera preséncia de Catalonha e des entitats membres deth Consòrci en 10 granes capçaleres mondiaus: The Washington Post e The New York Times (Estats Units), The Guardian e The Daily Telegraph (Reiaume Unit), Frankfurter Allgemeine Zeitung e Süddeutsche Zeitung (Alemanha), Corriere della Sera e La Repubblica (Itàlia), e Le Figaro e Le Monde (França). Era cooperativa valenciana Al Detall a estat era encargada d'elaborar er informe corresponent ar an 2025. Ath delà de comptabilizar era preséncia e es mencions a Catalonha, tanben n'analize eth ton, es actors e es hònts informatives, entre d'auti aspèctes.

Entre es principaus conclusions der informe destaquen es següentes:

• S'an publicat 768 notícies sus Catalonha enes 10 diaris analisadi pendent 2025, çò qu'equivale a aproximativament 2 diàries e ei inferiora ara xifra der an anterior (1.000). Aguesta chifra includís tant es articles en què Catalonha ei era protagonista principau (20,8 %), era protagonista segondària (18,8 %), o sonque ei mencionada (60,4 %).
• Per encastres, predominen clarament es notícies esportives (32 %) e culturaus (30,1 %), per davant des de societat (20,1 %), politica (11,8 %) e economia (6,0 %).
• Es 5 tèmes mès destacadi de 2025 sigueren: artistes e festenals catalans (112 notícies), FC Barcelona (101), diuèrsi esportistes (50), estudis e recèrques scientifices (41), e libres e filmes (37).
• Era distribucion des notícies per païsi ei pro equilibrada, damb eth blòc europèu en cap (Itàlia 29,8 %; Alemanha 21,6 %; Reiaume Unit 21,5 %; e França 19,4 %) e es Estats Units per darrèr (7,7 %). Es diaris damb mès notícies publicades son Corriere della Sera (150), The Guardian (93) e era FAZ (90).
• Maugrat que eth ton predominant des notícies ei eth neutre, çò qu'ei abituaus enes tèxtes informatius, ei destacable que eth ton positiu supère tostemp eth negatiu, e enquia supère eth neutre enes notícies sus gastronomia e torisme. Era unica excepcion son es notícies sus problèmes d'abitatge e toristificacion, e es de politica, en què eth ton negatiu supère eth positiu. Tanben se confirme que, a mès protagonisme, mès ton positiu: quan Catalonha ei protagonista dera notícia, eth positiu ei era categoria mès freqüenta.
• Era recèrca scientifica damb participacion catalana ei un vector clar de prestigi e reputacion, damb un ton majoritàriament positiu. Era UB ei era universitat que apareish mès soent (27 notícies), seguida pera UAB (10), UPF (3), e URV, UdG e UPC (1). Eth torisme, en cambi, projècte ua imatge ambivalenta. Catalonha apareish coma destinacion atractiva, especiaument ena premsa anglosaxona, mès tanben damb ton negatiu coma causa de problèmes relacionadi damb er abitatge, especiaument en ciutats coma Barcelona.
• En espòrts, eth FC Barcelona ei er actor centrau, mès non er unic; de hèt, er equip femenin de fotbòl deth Barça presente ua proporcion de ton positiu superiora ara deth masculin. Peth que hè ath club, es informacions sus era reobertura e es retards enes òbres deth Camp Nou an majoritàriament un ton negatiu. A quauqui esportistes se'ls identifique abituaument damb Catalonha quan apareishen en notícies internacionaus, coma Josep Guardiola, Luis Enrique o Cesc Fàbregas.
• Ena politica, es notícies sus Catalonha apareishen soent en relacion damb era governabilitat espanhòla. Junts per Catalunya e Carles Puigdemont son es referents catalans mès presents en clau de negociacion damb Madrid, mentre que Salvador Illa apareish coma figura estabilizadora. Tanben apareishen elements de preocupacion peth creishement dera extrema dreta catalana en relacion damb eth debat sus era immigracion.
• Es artistes e actors culturaus catalans damb mès aparicions pendent 2025 sigueren Antoni Gaudí (26), Pablo Picasso (17), Salvador Dalí (12), Joan Miró (9), Rosalía (6), Ildefonso Falcones (6) e Jordi Savall (5). En relacion damb Catalonha tanben apareishen nèmes coma es de George Orwell, Javier Cercas e Björk.
• Era lista de hònts informatives mediatiques mencionades enes notícies sus Catalonha ei encapçalada peth diari El País, seguit a cèrta distància per La Vanguardia e El Periódico de Catalunya.