El maxim organ dera entitat, presidit per Meritxell Serret, tanben a aprovat eth nòm de Catalonha Internacionau coma naua marca e aumentar eth nombre de bèques

Aguest maitin s'a amassat de manèra telematica eth Plen de DIPLOCAT, en ua trobada qu'a presidit era conselhèra d'Accion Exteriora e Union Europèa, Meritxell Serret, per delegacion deth president dera Generalitat, Pere Aragonès, que tanben ei eth president de DIPLOCAT e deth Plen. DIPLOCAT ei un consòrci de composicion publicoprivada integrat per 38 institucions e entitats.

Era conselhèra Serret a dat era benvenguda as assistents e a arregraït autant eth prètzhèt dera equipa de DIPLOCAT com des entitats membres entà "unir sinèrgies e posicionar Catalonha en mon". Era conselhèra a dit que DIPLOCAT ei un bon exemple de consens, damb longa tradicion ena societat catalana, en aguest cas coma "compromís compartit de projeccion internacionau". Fin finau, Serret a reïterat era volontat deth Govèrn d'acompanhar e impulsar aguesta internacionalizacion, "damb er objectiu finau d'èster utils autant ara societat com as nòstes contraparts".

Eth Plen a hèt ara aprobacion iniciau des naui Estatuts deth consòrci, que permet d'encarar era fasa finau deth procès. Eth Plen tanben a aprovat formaument eth nòm de Catalonha internacionau coma naua marca dera entitat un còp s'apròven es estatuts. Atau madeish, tanben s'a aprovat eth Plan de Trabalh entath 2024, damb era corresponenta dotacion financèra. Eth pressupòst globau deth consòrci se manten en ua chifra fòrça parièra ara des darrèri ans (2.1M EUR).

Era secretària generau de DIPLOCAT, Laura Foraster i Lloret, a arregraït era confiança deth Plen en tota era equipa dera entitat e eth supòrt as activitats que s'amien a a tèrme entà que DIPLOCAT contunhe estant "des dera diversitat e era pluralitat, non sonque un actiu de país senon tanben un actiu entà toti es membres deth consòrci".

Foraster tanben a estat era encargada de presentar a grani trèts es activitats previstes en Plan de Trabalh 2024. Entre es nauetats, a destacat ua campanha de promocion internacionau de Catalonha enes hilats sociaus; visites d'escambi de bones practiques en estrangèr damb representants des entitats membres deth consòrci e dera societat civiu, com ua visita a Dinamarca entà conéisher era aplicacion des naues tecnologies en sector agrari; era visita d'un grop de periodistes internacionaus en encastre dera premanida dera biennau europèa Manifesta, qu'aurà lòc en Barcelona eth darrèr trimesadèr der an; e un debat sus era crisi actuau des democràcies e eth tractament des notícies fausses, en tot coïncidir damb es eleccions ath Parlament Europèu e as Estats Units, entre d'auti tèmes. Tanben a anonciat qu'eth Programa de bèques de DIPLOCAT, qu'enguan celèbre eth 40au anniversari, aumentarà eth nombre de bèques des ueit actuaus enquia dotze.

Per çò que hè as actuacions que se mantien, Foraster a nomentat, entre d'autes, era visita a Ginebra entà conéisher eth modèl des Nacions Unides e es organizacions internacionaus coma complement deth cors "Accion deuant des organismes internacionaus e europèus"; eth monitoratge dera preséncia de Catalonha en mejans de comunicacion internacionaus e hilats sociaus; era campanha #BooksAndRoses d'internacionalizacion de Sant Jòrdi; es diuèrses publicacions digitaus, amassades ena colleccion Àgora DIPLOCAT; e eth programa de visitaires internacionaus, que convidarà periodistes internacionaus entà Sant Jòrdi e damb motiu deth Concors de Castèths de Tarragona.