Salvador Illa a presidit eth maxim organ de govèrn deth Consòrci, qu'a aprovat eth pressupòst e eth Plan de Trabalh der an que ven

Aguest vrèspe s'a amassat en Palai dera Generalitat eth Conselh Rector de Catalonha Internacinau, damb era assisténcia de representants de 34 des 38 entitats membres deth Consòrci. Dempús dera aprobacion des naui Estatuts e eth cambi de nòm de DIPLOCAT a Catalonha Internacionau deth passat mes de junh, aguesta ei era prumèra trobada deth maxim organ de govèrn deth Consòrci. Era amassada l'a presidida eth president dera Generalitat, Salvador Illa, que tanben ei eth president deth Conselh Rector, e qu'a dat era benvenguda as assistents e les a arregraït eth sòn prètzhèt.

Entre es principaus punts der orde deth dia dera trobada, ena quau tanben a participat eth conselhèr d'Union Europèa e Accion Exteriora e vicepresident de Catalonha Internacionau, Jaume Duch, i auie era constitucion formau autant deth madeish Conselh Rector com deth nau Conselh Executiu, atau com es critèris d'eleccion entàs vocalies d'aguest darrèr. Eth Conselh Rector tanben a aprovat eth Plan de Trabalh 2025 e eth pressupòst entar an que ven, que se manten en 2M d'èuros. 

Era directora generau de Catalonha Internacionau, Laura Foraster i Lloret, a estat era encargada de presentar es activitats includides en Pla de Treball 2025. Entre es mès remercables i a era 42au convocacion deth Programa de Bèques entà hèr estudis de master en relacions internacionaus en estrangèr, deth quau s'an beneficiat mès de 330 estudiants catalans. Tanben se contunharà hènt un monitoratge dera preséncia de Catalonha e es entitats membres deth Consòrci en mejans de comunicacion internacionaus e hilats sociaus, entà saber qui ne parle e en quini tèrmes. En linha damb eth prètzhèt amiat a tèrme enquia ara, se fomentaràn es escambis internacionaus de bones practiques, damb dues visites a Brussèlles adreçades a representants deth mon locau, per exemple, e se contunharà collaborant ena projeccion internacionau des entitats membres.