Salvador Illa a presidit eth maximau organ de govèrn deth Consòrci

Aguest vrèspe s'a amassat en Palai dera Generalitat eth Conselh Rector de Catalonha Internacionau, damb era assisténcia de representants de 28 des 38 entitats membres deth Consòrci.  Era amassada l'a presidida eth president dera Generalitat, Salvador Illa, que tanben ei eth president deth Conselh Rector, e qu'a dat era benvenguda as assistents e les a arregraït eth sòn prètzhèt. Posteriorament, Illa a delegat era presidéncia en secretari d'Ahèrs Europèus, Multilateraus e de Cooperacion ath Desvolopament, Agustí Fernández de Losada.

Entremiei es principaus punts der orde deth dia dera trobada, eth Conselh Rector a aprovat eth Plan de Trabalh 2026 e eth pressupòst entar an que ven, que se manten en 2M d'èuros. Era directora generau de Catalonha Internacionau, Laura Foraster i Lloret, a estat era encargada de presentar es activitats includides en Plan de Trabalh 2026. Entremiei es mès remercables i a es 20 ajudes deth Programa de Bèques entà hèr estudis de master en relacions internacionaus en estrangèr, deth quau s'an beneficiat mès de 350 estudiants catalans de 1983 enlà.  Tanben se contunharà de hèr un monitoratge dera preséncia de Catalonha e es entitats membres deth Consòrci en mejans de comunicacion internacionaus e hilats sociaus, entà saber se qui ne parle e en quini tèrmes. En linha damb eth prètzhèt amiat a tèrme enquia ara, se fomentaràn es escambis internacionaus de bones practiques, damb dues visites a Brussèlles adreçades a representants deth mon locau e de visites en airaus d'interès des departaments dera Generalitat de Catalonha o dera rèsta d'entitats consorciades, e se contunharà de collaborar ena projeccion internacionau des entitats membres.

En çò que tanh ara rèsta de punts der òrdre deth dia, se tracte basicaments de qüestions d'organizacion e administratives, coma ara era presentacion det Rapòrt de compliment dera legalitat der exercici 2024, informacion sus modificacions pressupostàries, qüestions de gestion economica e contractacion, qüestions de personau, e convencions signades e previstes.