Tanben s’a aprovat eth plan de trabalh entar exercici 2019, en ua session presidida per Quim Torra

Aguest maitin s'a amassat ena Sala Torres Garcia deth Palai dera Generalitat eth Plen deth Conselh de Diplomàcia Publica de Catalonha (Diplocat), entestat peth president dera Generalitat, Quim Torra, e ath quau tanben a assistit eth conselhèr d'Accion Exteriora, Relacions Institucionaus e Transparéncia, Alfred Bosch. Pendent era amassada s'a aprovat eth Plan Estrategic 2019-2022 e eth Plan de Trabalh 2019, presentadi pera secretària generau de Diplocat, Laura Foraster.

Quim Torra a remercat era grana òbra que desvolope Diplocat entà hèr a conéisher Catalonha en exterior: "Era diplomàcia publica qu'ei fonamentau entà seguir convertint aguest país en referent, per tota Euròpa e peth mon enlà. Dubèrti e sense intermediaris ei quan aguest país lutz mès que jamès". De un aute costat, eth conselhèr Alfred Bosch a assegurat que "era Catalonha reau ei ua Catalonha qu'a volontat d'èster e de hèr; d'èster liura, justa, prospèra e equitabla". E a hijut: "Aué confirmam que Diplocat seguís damb era sua òbra de projeccion internacionau, qu'ei indispensabla e qu'a tot eth supòrt dera Generalitat de Catalonha, mès que tanben a de besonh er esfòrç dera rèsta d'administracions e dera societat civiu". Entà Bosch, era vision de país que cau deféner "ei ua Catalonha qu'a volontat de projectar-se e d'acuélher tot aquerò que podem apréner deth mon" e a remercat que "era diplomàcia publica ei una airina basica de país".

Segon a explicat Laura Foraster, "damb eth lèma 'Dialòg internacionau - Connectam. Projectam. Capacitam' er organisme mèrque es tres èishi de trabalh mejançant es quaus desplegarà es airines classiques dera diplomàcia publica, coma er escambi de bones practiques internacionaus, es programes de visitaires, era organizacion de jornades e seminaris internacionaus, era capacitacion e era interaccion damb es mejans de comunicacion estrangèrs". En lo cors de la reünion s'es projectat lo nòu vidèo institucional de presentacion de l'entitat.

Eth plan estrategic qu'ei eth resultat deth trabalh amassa damb es membres deth consòrci, que i an aportat idèes e an participat en procès d'elaboracion. Damb era volontat de descentralizar era accion e dar votz a tot eth territòri, aguesta naua etapa includís tanben un plan especific entara internacionalizacion deth mon locau. Atau madeish, eth plan establís uns domènis tematics estrategics, consideradi prioritaris e identificadi coma debats globaus, com era Agenda 2030, era naua economia, es movements umans e era coesion sociau, e tanben aqueri a on Catalonha ei o vò èster referent, com er esperit d'enterpresa, eth torisme durable, era economia sociau e era innovacion scientifica e tecnologica, entre d'auti.

Tad açò qu'ei ath Plan de Trabalh 2019, que cau remercar era organizacion d'un seminari internacionau sus eth ròtle dera diplomàcia publica ena èra digitau; eth programa de visitaires internacionaus adreçat a periodistes entà conéisher de prumèra man era Diada de Sant Jòrdi; eth seminari per un sistèma alimentari durable; era organizacion deth 1èr Congrès internacionau sus era Formacion Professionau en Catalonha; e eth programa de borses en relacions internacionaus, qu'enguan artenh era 36au edicion.

Eth Conselh de Diplomàcia Publica de Catalonha, Diplocat, ei un consòrci publicoprivat creat en 2012, qu'a er objectiu de connectar Catalonha damb eth mon e promòir activitats que projècten era imatge deth país entar exterior, en tot crear ligams e relacions de hidança damb era ciutadanetat e es institucions de d'auti païsi. Ath delà, Diplocat encoratge ara societat civiu e as collectivitats catalanes a implicar-se e contribuir enes principaus desfisi e debats globaus e estimule era sua capacitacion entà èster un actor important ena scèna internacionau, tà establir pònts de dialòg durables en temps, damb intencion d'escotar e èster escotadi.

Diplocat qu'ei eretèr deth Patronat Catalunya Món e anteriorament deth Patronat Català Pro Europa, un organisme creat en 1982 precursor enes relacions catalanes damb era UE. Eth caractèr consorciau e plurau dera institucion s'a mantengut ath long des ans e des cambis de nòm.

Eth consòrci qu'ei composat de 38 membres, entre es que i a institucions publiques, collectivitats deth sector empresariau, deth sector sociau, sindicau e esportiu, universitats, escòles de negòcis e centres academics.